三獅先鋒

英格蘭國家隊大軍人才太多，點兵話事嘅德國人杜曹踢走腳法一般嘅中堅大將哈利馬古尼唔算太意外，反而兩位進攻名牌高爾彭馬同菲爾科頓落選，好多人覺得嘥料。但反映佢真正以態取人，唔係安察諾堤俾個位選尼馬，當巴西吉祥物浪費名額，又睇下今屆可唔可以將足球帶回家。

英超場場硬仗係咪會嚴重影響三獅成績，今次取決杜曹點樣部署。英格蘭嚟緊喺美國進行兩場熱身賽鬥新西蘭同哥斯達黎加，實際意義唔大，最重要係俾球員適應當地天氣避免受傷，部署恰當。喺擴大至48隊嘅炎夏世盃決賽周，由分組賽打到入決賽要踢8場，捱夜睇波嘅辛苦，落場嘅球星都唔係咁過癮，分組賽遇弱冇乜要大損體力。呢隊三獅勝在人腳平均，唔少主將喺球會正在當旺，杜曹多用優質副選兵踢分組賽又可掩藏實力先係上策。最要留意係世盃前成功跳槽巴塞嘅安東尼哥頓，成季踢過嘅硬仗唔多，已練成肯走肯衝嘅全面射手型前鋒，所以身價提升；卡尼唔使場場出，睇下哥頓做唔做到三獅今屆最強急先鋒。