擴大世盃，對港迷嚟講開波時間日夜顛，睇波更宜揀擇。除非你好恨睇海地、佛得角同庫拉索踢波，咁樣分組賽已不應錯過；鍾意睇球王，都要珍惜僅有嘅機會。事關C朗同美斯喺炎熱嘅天氣下領軍，老人家唔係踢緊沙職同美職，比賽水平大幅提升兼體力負荷極大下，葡阿搵唔到接班人，只怕淘汰賽早段收工。
22屆世盃冠軍，歐洲贏12屆、南美佔其餘10屆，亞洲同非洲代表最叻去到4強；對上6屆嘅主辦國都入唔到決賽。今屆美加墨佔地利但人腳唔平均，戰線拖長反而更不利弱旅偷雞，3隊入齊32強都唔易做到。歐洲佔參賽隊數三分一，喺阿根廷上屆12碼射贏法國之前已連贏4屆，今屆入到決賽要踢足8場，西班牙同英格蘭聯賽水平世界最高，人腳分到AB兩隊，歐洲雙雄奪標大熱之選。個人最期待日本同非洲雙雄科特迪瓦同塞內加爾發圍，藍武士眾主將放洋多年，蓄勢待發，冇咗三笘薰唔係末日。兩支非洲隊射手多又大利烈陽下作戰，亞非勁旅越留得越耐，呢屆世盃先更有趣。