入球騷的意義

置身獨霸武林嘅德甲，拜仁上季聯賽場均3.58球，合共入122球，但去到歐聯4強仍要止步。西甲二龍爭珠，巴塞今季開局4戰全勝，場均入4.25球，暫時大大遠超上屆封王時場均嘅2.5球；拉芬夏、拉明耶馬加埋費明盧比斯4場波共入咗14球，無堅不摧，將皇馬雙鋒麥巴比同雲尼斯奧斯比下去。西甲同分計對賽唔計得失球，正當巴塞毫不惜力全力入波娛眾，歐聯冧莊嘅PSG喺法甲先玩大讓賽，開季3戰只得2分；而拜仁亦突然醒覺，上仗德甲先收起入球機器卡尼同助攻王奧利斯，結果錄得佢哋喺德甲一年半以來首次入球食白果，戰果可恥，但主帥高柏尼終於明白，佢哋喺國內係可以學PSG玩大讓賽。

歐聯大聯賽成立兩屆，場均由3.27球升至上屆3.47球，賽事多了，大戰多了，列強又要蹂躪弱旅，計得失球爭前列排位，可觀性強。但唔好忘記PSG近兩屆封王之路，喺分組賽都係前8名不入；安歷基唔會再學德國人教緊嘅佢前度巴塞，一往無前，入球騷往往只係用嚟娛眾，當強強對戰時，未受考驗嘅防線先見真章。