歐聯列強冇柱躉

歐聯四強矚目，巴塞同PSG最多捧場客；國米要撼巴塞，大戰前卻經歷3連敗，明顯一心幾用唔夠兵源，單靠一位唔係頂級嘅禁區射手拿達路馬天尼斯，今季隨時一無所有。

高大柱躉箭頭，永遠係轉會市場熱話，但事實證明踢法已嫌單調過時，真正列強或只作其中一武器。以歐聯4強為例，原本掛頭牌嘅巴塞老箭頭「羅拔仔」因傷冇法出戰呢兩個回合，但之前冇佢，一樣打低擁有球王級箭頭麥巴比嘅皇馬，證明現今球壇踢法要機動難捉，打團隊戰先能成強中強，冇鋒陣一樣可以高效。巴塞同阿仙奴最強食胡人物係雙翼，兵工廠一如亨利喺節目大爆，最勁係兩翼回防勤力，形成密不透風防守，9號位球員非最重要。國米打法四隊中最單調易捉，明晚非必要唔敢用後備嘅老中鋒阿拿奧杜域攻巴塞，削弱回防人數。PSG同阿仙奴一樣用西班牙教頭，唔興用高大柱躉中鋒；走咗麥巴比，PSG射手箭頭奧士文尼迪比利身高得1米78，佢今晚專責牽制對方同胞中堅沙列巴。英法兩強「冇鋒」對弈，就係歐聯頂級對決。