世界盃超新星
世界盃話咁快就打到八強，數數手指就得返8場波睇。雖然冠軍神射手呢啲大獎都未有太多眉目，但畢竟都差唔多打咗九成比賽，點都有啲小總結可以分享下，而今次想講嘅係「世界盃超新星」。
今屆踢到而家，似乎坊間無乜人談論啲新星，一來就當然係資訊愈嚟愈發達，唔再存在「有個住喺亞馬遜河邊嘅巴西仔好好波、無踢過大球會㗎」呢啲童話故事，係好波嘅就一早保送咗去歐洲班霸度踢青年梯隊；二來，而家舞台多，後生仔好早搵到發光發亮嘅機會，唔使等到四年一次嘅世界盃先至有人識。譬如話其實麥巴比今屆先得23歲，仲係好後生，而佢今屆表現依舊出色，踢四場入五球㖭，但唔會有人話佢係超新星㗎嘛？同樣道理，一早喺大球會擔正嘅比寧咸、沙卡同埋穆斯亞拿呢啲，好難再話係乜嘢「超新星」。咁個條件越嚟越窄，又要後生又要素人又要踢細球會咁，今屆有啲乜嘢新星跑出呢？睇到今日嘅話就有兩個：加普、法迪奧。
兩個之中名氣最大嘅算係荷蘭嘅加普，大多數本地球迷識佢都可能係因為剛剛過去嘅夏季轉會窗，有傳過曼聯有意帶佢去英超發展，只係PSV話唔啱價唔肯放。結果今季佢踢咗14場荷甲，已經入咗9球，仲有12個助攻，漫畫一樣嘅成績表。跑得、扭得、高大、仲要係左右開弓嘅雙槍將，難怪雲高爾視佢為球隊核心。
克羅地亞嘅法迪奧年僅20歲，但今季就已經成為RB萊比錫嘅必然正選，以中堅嚟計係相當後生嘅年紀。分組賽最後一場對比利時，戴「黑面罩」的法迪奧一夫當關，瓦解咗比利時黃金一代唔少攻勢之餘，亦能交出關鍵長傳協助球隊組織攻勢，肯定係世界盃後各大豪門嘅頭號獵物。
