兵工廠封王關鍵

英超近年罕見嘅3強鼎立，究竟係藍月首得4連霸？紅軍送高普告別大禮？定係兵工廠破20年英超錦標荒？只見歐洲其餘4大聯賽嘅領頭羊，暫分別拋甩次席多達7至15分，其中「一哥」國米、皇馬同PSG更可兼博歐聯，要魚又要熊掌，但英超爭霸仍然係季尾焦點。 

英超3雄，藍月上季89分封王，但「兩紅」來勢太猛，今季再攞呢個分數未必夠數，或要勝出餘下10場；哥帥王牌係奇雲迪布尼，呢位中場大腦嘅健康、狀態一直有疑點，唔敢用盡有原因。利記仲差3分就追平上季攞第5嘅全季分數，反彈力度驚人，加埋高普注入「告別元素」；但長期受傷兵困擾，年輕球員欠大賽經驗同前鋒把握力平平，會係鬥入直路最蝕底一隊。兵工廠上季正正係4月甩轆連失10分，斷送大好爭霸形勢，今屆補強眼光好，小兵有過「臨尾香」經驗，能唔能夠重奪失落廿年嘅英超錦標，關鍵提早喺今晚歐聯反擊戰嘅賽果；贏到過關，又有機會聚集大軍趁空檔去杜拜福地集訓，返嚟3.31作客曼城嘅氣勢會進一步攀升，球迷期待嘅另一場天王山之戰。