今年最後一個主要國際賽期前，英超本周末將會上演3場重要大戰，爭霸藍圖嘅重要指標。黑貓要擋住阿仙奴死球入波攻勢，確認本身係近年最強升班馬；曼聯作客聯賽新敗嘅熱刺，要打沉對手正式重返爭霸行列；曼城主場鬥利物浦，邊隊先係兵工廠上半季最強挑戰者，此仗最具指標性。
各隊人腳已大定，要等冬窗賭博性班兵可能太遲，睇季初9場波嘅數據同排陣模式發現列強總有一啲超級武器，別樹一幟。夏蘭特入13球遠遠拋甩後追者，步大力雄踢法屈機，藍月呢張王牌得天獨厚，甚至試過成功擊破兵工廠防線。相反兵工廠勝在平均配合絕殺死球攻勢，同藍月風格形成強烈對比，遇弱隊死守最著數。爭霸另一要角，唔似係頭重腳輕、防守失誤太多嘅「兩紅」利物浦同曼聯，反而車路士擁有世界級中場核心，安素同卡斯度兩大南美悍將，又有全能兼傷好嘅列斯占士不時推前打防中，靈活度同級數係世界頂級，唯一可惜唔要正宗箭頭，唯有等高爾彭馬傷好，呢架車有力隨時突入爭霸戰團。