死球FC
季初英超繼續難估，輿論暫時唯一持續傾向阿仙奴好大機會打破該會塵封嘅英超錦標荒，靠嘅係佢哋成為咗一支絕殺嘅死球FC球隊。阿仙奴鬥水晶宮，看台上不時影住兵工廠「悶蛋足球」始祖、年過八十嘅領隊格拉咸，睇到懨懨欲睡都幾有趣。當年就係佢靠場內四大長老唔失波，前面有個高大中鋒阿倫史密夫，幫球隊兩奪舊制嘅英甲冠軍、包括1991年全季38場波有24場不失球，當時外界毀譽參半，同兵工廠現時走勢有幾分相似。
豪擲2、3億英鎊擴軍唔代表一定攞到冠軍，著急嘅達Sir上屆用黑魔法消極足球繼續失手，今季即進化到變成銅牆鐵壁嘅死球FC一哥，批評漸變讚賞；其他球隊爭相仿效包括以往最俾人睇唔起嘅界外球戰術，一切又係成績作評論標準。阿仙奴現時場均得7個角球排英超第1，死球攻勢套路多，贏波過程似倒模，娛樂性不強；但只見佢哋執行死球嘅紀律同部署，明顯賽前閉關不斷下苦功，同1991年拋離利物浦7分封王相比，路仍漫長對手更多，又睇下呢支死球FC能否一放絕塵。