冬窗最強救兵

非、亞兩大國家級別賽事即將爆發，暫時大約有32名非洲兵同8位亞洲兵，要暫別所屬英超球會；最受影響係森林冇咗6將、賓福特走咗4件，影響護級。另一足球戰線係冬窗交易，熱刺率先挑起火頭，快手簽入德國箭頭迪姆華拿，頂替孫興民；佢哋主帥普斯迪高普迪路搞得掂巴西人李察利臣，今次心雄到借一位近年喺德甲同英超都唔識入波嘅名氣前鋒，又放長雙眼睇吓呢支北倫敦大會，今年係咪可以破宿命，一嘗16年首冠滋味。

冬窗要搵到雷霆救兵一向唔易，呢個月最矚目嘅「新兵」係入選過英格蘭國家隊嘅箭頭艾雲東尼，因賭波坐咗8個月波監，到本月中刑滿。原本佢効力緊嘅賓福特，季初起一直唔愁降班機會，有機會本月肯以約1億英鎊，放售佢俾大會做爭霸棋子；點知佢嘅前鋒好拍檔麥比奧莫養傷2個月，呢隊蜜蜂兵團即刻5連敗跌落尾5，護級響警號，要知道東尼唔係華拿，上兩季喺英超共入咗32球，中下游隊難得手執一張咁嘅王牌，又即將登場，相信蜜蜂唔會要錢唔要命啩！？