新正頭，梗係要同大家拜個靚年啦！依雯祝各位有球必應、壯如波牛！我哋初五啟市，足球轉會市場就啱啱收市，同香港股市差不多，靜靜局咁。今次豪門唔再大灑金錢增兵，調番轉頭賣人多過買人。英超球隊今個月喺買人方面總共花費2.12億英鎊多啲，但係賣人收入就超過2.3億鎊，竟然收入多過支出，20年來英超首次喺單一轉會窗中有盈利。咁似我哋香港人嘅？儲足銀彈，等樓價大瀉時掃平貨，可能球市都要咁玩法。講到最闊綽，當然係中超啦！車仔嘅奧斯卡杜斯山度士就以近5,300萬鎊加盟上海上港，成為冬季轉會窗最大手筆交易，長春亞泰亦唔執輸，轉會窗關閉前以2,000萬鎊引入屈福特射手恩哈路。