英超特色之一，就係有爆冷賽果，估唔到先至刺激吖嘛！曼城大炒史篤城都仲可以話係意料中事，不過開季7場全敗兼波都未入過嘅水晶宮，竟然擊敗車路士，驚喜冇？水晶宮亦終於結束730分鐘嘅聯賽入球荒喇！但係呢個咁重要嘅入球，唔係來自自己球員，而係對方擺老烏——右翼安祖斯唐辛喺11分鐘底線傳中，卡比耶諗住接應，但個波省中車路士守將艾斯派古達入網。
呢個士哥真係時來運到，亦可以叫做天助我也呀！水晶宮開心得7分鐘左右，車仔就由新兵泰莫爾巴卡約高一頂入網追成平手，不過完半場前，水晶宮憑翼鋒韋費特沙夏單刀殺入禁區一射破網而再度領先，之後頂到維持贏2比1完場，終於打開勝利之門。水晶宮之前被嘲提早鎖定降班資格，家陣以弱勝強，型番一仗！