利記埃及球星沙拿公開討付教頭史洛，紅軍落入大危機命運待決，其他英超大球會應再次以此為鑑。摩洛哥雖然喺上屆世盃打入四強，但明顯地非洲球員喺整個歐洲主流球圈嘅影響力一直減退，唔再神秘之餘新人嘅潛藏更唔及青訓有系統得多嘅南美新星。況且一眾非洲精兵要每兩年踢一次為期成個月嘅太公波非洲國家盃，對好似賽期密麻麻嘅英超球會，簽非洲兵蝕人工又損實力。沙拿今次按例可一走了之避風頭，先為埃及喺非國盃打江山，對疊馬嘅紅軍前線兵源冇太大影響；但曼聯走咗包括前鋒重心麥比奧莫同翼鋒阿密特迪亞路，新特蘭冇咗4、5位主力老遠跑去北非踢太公波，影響難料，用非洲兵擔大旗要識計數。
今次有4隊英超兵唔受今屆非洲國家盃影響，包括紐記、車路士、列斯聯同阿仙奴，其中兵工廠幾年前身受其害，高價續約年逾30嘅非洲王牌射手奧巴美揚，情況似足沙拿，加薪表現即刻走樣仲影響大軍士氣。結果阿迪達死諫球會必須斬纜，阿仙奴亦冇再有任何非洲兵，球會之後連續3屆英超攞亞軍。