苦了VVD

紅軍主帥史洛治承繼高普重要寶藏，首季驚喜封王英超，原來守業易創業難，紅軍季前豪花擴軍，新王朝打造唔到，依家博英超前五名都要迎難而上。唔喜歡輪換嘅荷蘭人喺球會嘅日子，只怕唔耐得過季前續約兩年嘅同胞大隊長、鐵人VVD華基爾雲迪積克。

英超再成紅藍之爭，但紅方換上阿仙奴，現今英超除咗打錢多，爭霸導向慢慢轉移鬥多優質兵源平衡大軍三線，應付瘋狂賽程。呢點係球季打咗三分二後，利物浦繼續捱打嘅今季最大敗筆。從主力出勤率對比「兩紅一藍」戰力，紅軍VVD唔單止喺英超數據係9位門將之外，唯一全英超場上全勤踢足2,250分鐘嘅球員，另外8場歐聯亦踢晒，一人力頂全條紅軍防線。唔喜歡輪換嘅史洛治，計英超係三強中唔計門將，最多已有4位主力上陣逾2,000分鐘，好易踢殘，防線更係唔敢換兼冇人可頂上。紅軍「鐵人二哥」、英超上陣2,153分鐘嘅蘇保斯拉爾，啱啱舉手領紅出場，嚟緊可以休息下；34歲嘅VVD明晚又要領軍硬擋主場強勁嘅黑貓，佢大傷過嘅膝頭哥，要多多保重。