紅軍繼任人

頂級球壇競爭激烈，壓力超大，有冇功績都唔甩；連幫緊紅軍爭緊四冠王嘅高普、已領巴塞隆拿打入歐聯16強嘅該會名宿沙維，都事先張揚季後走人，球壇名帥爭奪戰，提早出現。高普喺近年英超嘅份量，唯有曼城哥帥可比；接呢個燙手山芋嘅人，一定面對巨大壓力，只要你睇返費爵爺同雲爺爺，當年分別離開曼聯同阿仙奴後，接任人下場就知一二。

現時下任紅軍接班人嘅熱門名單，包括沙比阿朗素同謝四兩大紅軍名宿、白禮頓嘅迪沙比、連達斯(高普副手)，同前拜仁少帥拿高士文等，全部上位空間大，搵呢類「後生仔」，抗壓力會強啲。比較之下，迪沙比就算唔係紅軍首選，來季被撬走機會唔細；教咗呢隻「海鷗」一年多，再幫球會升呢，今年同紅軍同樣爭緊歐霸。球會面對多線發展，先後被車仔撬走兩大防中，長期傷兵成蘿，戰績仲頂得住；同高普一樣好肯用啲大冧巴新人，去夏喺英冠撬走嘅巴西前鋒祖奧柏度，暫時今屆入球只比艾寧夏蘭特少1球，迪沙比有膽識有慧眼，曼聯、車仔都𥄫到實！