英超正進入瘋狂賽程，同時間冬窗轉會即將開放，以往感覺上呢個期間嘅轉會交易未必活躍，筍貨較少；但如今比賽場數超密，一隊波要有A、B同C隊，先頂得住無盡嘅傷兵潮同爭取下半季目標。上年同期，曼城罕見大手掃貨包括德甲射手奧馬馬莫殊等，先止住跌勢再踏入今季加入爭霸戰團；列強如今水頭充足唔會慳住荷包，只見般茅嘅快馬安東尼施美安標價6,500萬鎊，英超強隊全部心動，呢位自細喺英國踢波、進步唔會太大嘅加納球星，近期落力配合，般茅冧檔佢就連續三場士哥，做靚自己盤數，但係咪踢大會曉飛，球迷同大熱得主藍月哥帥，事前都係得個估字。狼隊同般尼勢成英超降班雙膽，其他中型班唔多怕放售隊中精英先行套現，最多寶藏較易撬係水晶宮，領隊講明季後走頭有望教大會，樹倒猢猻散格局已成。隊中三獅精英中堅馬克古希、中場阿當華頓過埋世盃唔係現在呢個價；中下游球會救星必選水晶宮嘅法國中鋒桑馬迪達，大隻佬少傷又踢法全面，28歲有機會執多張長期肥約先收山。
日報