曼聯主場輸俾包尾嘅西布朗，令曼城可以提早5輪聯賽稱王，「藍月」隊長高柏尼急忙喺紅魔場波完場前召集到部分隊友，到車程距曼城球場25分鐘，位於Hale嘅一間細酒吧，求其慶祝。英超好睇，在於百花齊放。曼城提早近一個月封王，係英超史上第二快捧到冠軍嘅一季，值得恭喜；但對大部分強隊球迷嚟講，無癮程度拍得住兩季前，神奇球隊李斯特城愈放愈順帶到尾。
曼城「不戰封王」，其餘三強位置好穩，仲因為歐聯來季改制，已不用再為先打歐聯附加賽心煩，今屆英超大可提早埋單計數。曼聯分數有進步，但以班費同剩番英足盃可爭，摩帥今季有負魔迷厚望。車路士、阿仙奴及熱刺，今季總積分都幾乎肯定比上季大幅退步，可謂倫敦淪陷；護級三弱西布朗、史篤城同修咸頓位置長期不變，九死一生，今季餘下大約40場英超，大部分已變例行公事。初捧英超冠軍嘅藍月領隊哥迪奧拿，喺曼聯輸波時打緊高球，其心態大概也可反映今季英超嘅「激烈」程度。