世冠盃湯藥費
不論國際足協或者歐洲足協，每個大賽都係佢哋度橋改制賺大錢嘅良機。球星只係搖錢樹，比賽密度接近瘋狂，加速早熟早殘，但只要有長約就有保護傘。只見PSG嘅成功，曼城跟風瘋狂添精兵，車路士亦用超長合約喺世界各地搜刮新星；只要當中有兩、三位爆紅，加埋頂級比賽場數夠多，盤數就有機會虧轉盈，其實唔會有乜長遠計劃，只係博一鋪。
拜仁啱啱10蛋贈奧克蘭，反映頂級足球開倒車，以往一支大洋洲業餘隊，會先鬥埃及艾阿里之流，梯級式打大佬；但艾阿里依家可以夾硬編排先鬥美斯嘅國際邁亞密，結果嘜高超貴嘅門票，大割價仍冇人吼，臨場要大賣學生票撐場。世冠盃大增分組賽場數同獎金，用夠12支歐洲球隊孭飛，只係巧立名目大家賺多啲。奧克蘭就算全輸三場但參賽費都執2,800萬港元，任人魚肉都有補償。打入世冠盃決賽兩強更要打足7場至下月中，再開操備戰新季瘋狂賽程，完全打破常規足球賽季嘅格局，又睇下國際足協呢筆接近10億港元嘅湯藥費，夠唔夠補幫最終王者。