英超唔快速求變，好易落後。曼城連續兩場入球交白卷，近年極罕見；一直唔睇好佢哋爭霸，除非執著嘅哥帥明年1月轉軚買正前鋒。哈利卡尼跳槽曼城唔成入球量大跌，球會今季用「保守大帥」紐奴接帥印(編按：已被辭退)，分分鐘成為今屆成績最差嘅倫敦球會。好多人想曼聯踢走蘇B求變，啱啱大炒熱刺又頂住先，但用一對合共70歲嘅前鋒組合贏波叫做止咳；但紅魔今晚歐聯作客鬥攻嘅阿特蘭大，後防先等吃驚風散，到禮拜六迎戰曼城先係戲肉，場場聽費Sir話要出C朗正選，一班新星坐後備席真係行得通？呢種變，有啲過時。
季初阿仙奴吞曼城5蛋，廠迷恨死阿迪達，又話高層亂泵錢買新人做水魚；結果之後成條防線換晒人，大膽用新人擔大旗，「降班龍」蘭斯達爾搖身變三獅首席「神龍」，之前睇死佢嘅人紛紛要道歉咁嚴重。阿仙奴下一輪鬥屈福特，但國際賽後返嚟作客利物浦，先係「神龍」同達Sir嘅大考。道歉唔使急，英超一地眼鏡碎，從來係常態，誰保證今屆英超係車仔單打獨鬥利物浦。