唔係摩佬投熱刺，年薪高達1,500萬英鎊，都唔會有人提番起哥迪奧拿教曼城攞緊2,000萬鎊年薪，居英超之首。不過睇番數據、踢法同陣容深度，「藍月」都走緊下坡，唔似回氣咁簡單，今屆要爭英超3連霸，難度極大。熱刺到頂，狠炒樸治天奴；佢哋嘅鄰會阿仙奴都好頹，見死敵炒得咁爽快，老闆應該心思思，主帥艾馬利年薪只係600萬鎊，補足走人濕濕碎。第四季教藍月嘅哥帥呢刻仲穩陣，但去屆攞國內三冠王好威，其實歐聯8強輸俾熱刺打擊好大；陣容步過頂峰，哥帥冇大刀闊斧改革又唔肯用新人，現在踏入季中傷兵漸多，問題就來了。
雖然藍月喺歐聯分組賽放甩，但只因同組對手太弱，今晚鬥薩克達當練習賽咁踢都得，但下月聯賽對曼聯、阿仙奴同李斯特城先係真正考驗。對比上季同期13場聯賽有11勝2和入40失5球，今屆大跌watt得9勝1和3負入37球失14球；上場僅勝車路士嘅控球指數得四成幾，中場失控，會係哥帥殺著失靈嘅先兆，因住俾紅軍愈放愈遠。