谷巴神奇勁過哥帥

高普同哥迪奧拿近5屆壟斷英超全季最佳領隊大獎；今屆6位候選人，前6位球隊中嘅曼聯滕哈格同利記高普冇份，哥帥超班，重奪失落一年嘅榮譽似無懸念。如果有飛躍進步獎，之前從未執教過英超嘅森林波士史堤夫谷巴，神奇勁過哥帥，必大熱掄元。

呢位威爾斯人嘅左右銘是「如果我們堅持下去，這個計劃就會奏效；在合適時候可添加一些，但不會在每周一的訓練中重頭開始。」但諷刺係佢遇上希臘狂人班主，今屆組軍「棄21入30」球員，其實同車路士一樣亂石投林；只係谷巴神奇帶隊首季即升班，季初脫腳亦有免炒金牌。捱過最苦，陣容亂點鴛鴦都試出彩虹，加上踢返簡單足球，進攻直接得多，主場氣勢又勁(暫排第10)；30名新兵總有幾件好貨色，借得鋼門基羅拿華斯係架勢、練到季初喺德甲千零萬英鎊貨仔嘅新仔箭頭艾禾尼爾，季尾3戰入5球搶得7分係保命殺著。今屆下半版10支球隊，唯一得谷巴同韋斯咸嘅莫耶斯，倖存教足全季；唔使炒人都過到骨，難怪森林希臘班主牙擦擦，讚自己獨具慧眼。