達米安馬天尼斯
最佳聯賽係咪應該招到最佳人才？計今屆世盃阿根廷冠軍隊成員，接近10人踢緊或踢過英超，最叻算係老兵中堅奧達文迪，幾年前喺曼城攞過兩屆英超，但已南下轉戰賓菲加。英超現役中，最老資歷嘅「金手套」得主達米安馬天尼斯，踢緊中下游維拉；當打鋼鐵雙防中、阿歷斯麥阿里士打同1億英鎊球星安素費南迪斯，加埋「藍月」後備前鋒祖利安艾華利斯，可唔可以再「升呢」以證身價；效法阿根廷前輩射手阿古路、泰維斯同中場悍將馬斯真蘭奴，喺英超發光發熱，考驗好多。
贏咗世盃返到所屬聯賽，應該衣錦還鄉，但「美斯身邊最重要男人」達米安馬天尼斯攞完世盃，就跌入低谷。世盃攞獎囂張咗被插，返到球會要打護級戰，心理上要調節，佢嘅把關技術去到世界級，冇乜人非議；但維拉新帥艾馬利未停過針對佢，仲公開話佢棄關出迎搞到輸2比4，搵代罪羔羊居多。有傳艾馬利季後想賣走套現，「龍」游淺水，30歲嘅馬天尼斯又何嘗唔係想投身歐洲豪門、做返次大佬！