歐國聯爆冷連場，但列強難得面對場場硬仗，比起南美兩大勁旅巴西同阿根廷嘅備戰程序，理想得多；除非屆時卡塔爾場內冷氣失靈，焗死歐洲隊，否則呢屆「世盃大戶」歐洲好大機會繼續冧莊。睇返歐國聯A組16隊中嘅12隊有份踢今屆世盃，去到9月歐國聯仲有尾兩輪大戰，畀強隊作最後演練最著數。相反近數十年歐洲隊爭世盃冠軍大敵巴西同阿根廷，啱啱先玩完國際賽；巴西連勝南韓同日本，意義唔大，「南美雙雄」未來數月亦甚少有對抗性極強嘅硬仗備戰，隊內大部分球星又早已融入歐洲各大聯賽中，踢法易被洞悉，呢個亦係近4屆歐洲隊壟斷世盃嘅主因。更大利可能係今屆世盃創先河，安排喺11月下旬開波，尤其置身最激烈英超嘅歐洲列強精兵，獲益最大；當中「三獅兵團」英格蘭嘅主將，絕大部分英超搵食，喺歐國聯未勝仲可以求其找個藉口，但今屆爭世盃已係天賜良機。最可惜係大賽球隊意大利，踢歐國聯湧現唔少新人，冇得去卡塔爾，唯有等兩年後嘅歐國盃。
