紅軍以弱勝強，或者多得低潮中要踢得更務實，由沙拿改踢中鋒獨闖「藍月」敵陣，防線縮後令缺點不致暴露太多；老米拿打右閘踢足全場、中堅祖高美斯突然回勇，兩大驚喜。呢種主場都要示人以弱嘅踢法，曼聯早前迎長勝軍阿仙奴也試過，一樣奏效，始終Big Six勝負難測好睇。曼城開季多咗副新「入球機器」，入球如麻又能大炒紅魔，可能令哥帥自信大增，但咁嘅氣勢都仲要落後阿仙奴4分；佢徒弟阿迪達肯用富安健洋改踢左閘守死沙拿，但好返後未復勇態嘅魯賓戴亞斯，拍住級數一般嘅另一中堅尼敦艾基，係「藍月」一大漏洞。另外哥帥唔太喜歡用盡5個換人名額，兵源咁足，但今屆聯賽主力都係用13、4個；啱啱呢場都喺89分鐘先換咗一個，基亞利殊同馬列斯坐足冷板，周中又冇比賽，留力做乜？
哥帥託大球迷有福
世盃前嘅榜首地位未必有太大意義，又或者哥帥覺得阿仙奴嘅小兵、同排陣更保守、極側重部分攻擊主力嘅熱刺，唔係對手；反正Big Six下年初又可以再增兵打過，英超拉得更近，球迷之福。