阿根廷唔會似厄瓜多爾
任你用大量金錢、從小培養同收埋半年練兵建立一支「魔鬼」隊；一到大場面俾對手嚟個全場壓迫，即變「山西豆腐」，全隊毫無隊型、0中框射門，強弱懸殊；卡塔爾門將艾舒比4年前係亞洲盃金手套，揭幕戰評分係全場22位正選最低，差到唔似真。
阿根廷唔會似厄瓜多爾
堂堂亞洲盃冠軍輸得咁肉酸，另一西亞「勁旅」沙特，今晚對住南美一班馬阿根廷，會唔會同一命運？首先沙特4年前亞洲盃吞卡塔爾0比2，大軍名單又全係國內聯賽効力嘅土炮；今年踢咗14場波，冇一場入多過一球，悶蛋足球，只係部分主力上屆踢過決賽周，應該冇主隊咁亂章。不過厄瓜多爾單靠當年踢英超都麻麻嘅老將上半場入兩粒，下半場收手等未來兩場硬仗。相反阿根廷最強係球王美斯唔會好似C朗再咁獨食，肯為隊友鋪橋搭路，拍住新星祖利安艾華利斯或拿達路馬天尼斯，都會甘心造就對方；而且阿根廷最唔願意落次名喺淘汰賽即遇巴西，今晚喺香港食飯時間開波，必傾力派蛋，呢場波可能先係今屆分組賽最懸殊一戰。