四冠定無冠

全英超最高人工、周薪超過50萬鎊嘅夏蘭特，自去年尾起副入球機器失靈居多，拖累藍月成績；只見佢喺上仗英超賽前用手機，低頭睇住周薪僅350鎊嘅16歲阿仙奴學徒球員杜文仔神奇演出，唔知有冇無名火起，決心喺歐聯打返場爭氣波。

阿仙奴同曼城都爭緊四冠王，但治軍理念唔同，阿仙奴用家嘅想法推升隊內士氣，唔分大細但冇乜人表現突出；未來隊長懷斯被安排睇實杜文仔，當大哥哥幫佢成長變另一位沙卡。藍月近幾個轉會窗花咗唔少錢大換血，正選嗰班平均都有廿幾萬鎊周薪，但唔知係咪哥迪奧拿近年捧盃太多，場內一班大哥總係冇咗一份打甩門牙帶血吞嘅拼勁。睇返歐聯淘汰賽史上作客落後3球或以上，只有3隊喺次回合真正反勝晉級，對上一次已係18/19年嘅利物浦，當然唔易。聯同16強首回合作客淨輸3球嘅士砵亭、熱刺同車路士，相信只有曼城有能力翻盤。皇馬上次交手贏神勇嘅華維迪，藍月需要夏蘭特再次啟動佢副入球機器，否則被雙殺擊沉士氣，只怕引發連鎖反應，今屆一冠不保。