狂牛主帥吃香

今屆歐聯決賽組合係由兩位西班牙領隊鬥法。喺英超佢哋同樣係最具分量嘅一群教頭，跟阿仙奴主帥阿迪達同期出道、又同齡嘅沙比阿朗素突然應承下季轉教車路士；連同般茅嘅伊拉奧拿據聞來季會轉投另一英超隊，加埋曼城哥帥同維拉艾馬利，老中青狂牛主帥事實證明喺英超都撈得掂，外界自然期待沙比幫到車路士重振雄風。

車仔氹得掂呢位前皇馬教頭、仲係幫過德甲利華古遜打冧拜仁王朝嘅西班牙人嚟倫敦，一份肥約加埋買人話事權走唔甩。英超唔同傾向個人主義嘅西甲，沙比唔會因為不斷要一班球星開戰術會議，俾人成功造反推翻。就算車仔下季踢唔到歐霸或者歐協聯，好似今屆嘅曼聯停一停，亦都唔係壞事，更有助係英超打返上前面甚至爭霸。只係車仔陣容要執嘅地方唔少，門將最唔穩陣，箭頭係英冠質素嘅戴納同將會喺拜仁借用後回歸非洲兵尼高拉斯積遜，都唔會係沙比杯茶；最重要係大哥級安素費南迪斯同高爾彭馬，回復到球星級嘅價值，咁就證明到沙比喺英超企得住腳。