王生絕對不是會隨便開口的人。他每一次公開發言，背後都有計算。所以當他高調喊話，公開尋找當年香港寬頻、年薪過百萬中大畢業生強哥，作為投資者，你第一個反應是「哇！好有情義」？其實應該問：佢想達到咩效果？
找一個舊員工有100種方法，不需要公開喊話。他選擇高調公開，目的不是單純搵人，而是要讓這過程被人看見。香港人看到，會覺得是一個重情義老闆；年輕人看到，會幻想自己有日都是「被老闆記住嗰個人」；消費者看到，對HKTVmall親切感多一層。一個動作，三重收割。
移民潮後，香港人集體情緒複雜。王維基這動作精準插入情緒缺口：我記住你，我哋係同路人。這種歸屬感有消費轉化力，亦令一班有志後生仔都想成為他旗下一員。但這動作同時反映一個現實——HKTVmall價格戰可能已打到技窮。面對淘寶、Temu、京東，價格上沒優勢可言。當價格競爭打不贏，唯有同丁蟹一樣打感動，這是品牌行銷最後一道防線。
順帶一提，我識這位強哥，我們曾在同一個演講做嘉賓。強哥是真實的，但無意中成為品牌操作道具。情感是真，計算亦是真，兩樣並存。最高的marketing，是令你覺得佢唔係marketing。