歐霸之王落難記

英超踢咗首輪，睇戰果、睇球隊玩法比以往更瘋狂，唔好再信乜嘢等到聖誕節前後，搞唔掂隊波先郁手炒領隊。在英超會「相信過程」(Trust the process)淨返阿仙奴老闆高安基家族，其餘今屆19隊嘅領隊，冇一隊會有阿迪達呢刻咁老定，同球會劍指英超同歐聯冠軍。只係估唔到佢之前嘅兵工廠波士、維拉「歐霸之王」艾馬利，已搖身一變成為下一位被炒嘅大熱門。

維拉唔係艾馬利呢位西班牙名帥，唔會前屆入到歐聯八強，再上屆攞到「愛Sir」專屬嘅歐霸；不過維拉出入貨嘅膽量，自從上年年初出售哥倫比亞新星前鋒杜蘭俾艾納斯，大賺數倍後變得更狠。今夏更唔怕被拆骨，上仗開波即0比4落後白禮頓，英超強隊罕見；對比數個月前贏歐霸，維拉冇咗半隊正選，傷兵又多，包括準備去沙特職賺埋水尾嘅箭頭奧尼屈堅斯冇影。咁多年講英文仲係「甩咳」嘅艾馬利，喺維拉接近4年嘅教波任務似乎見到盡頭。上季「第一滴血」，森林踢咗3場就炒咗主帥紐奴，英超今屆第一位落鑊嘅主帥，好快可能出現喺大球會。