曼城連敗兼共失6球，今晚喺歐聯要回敬利記3球，收復首回合嘅失地，機會好微；始終藍月財大氣粗，但未買到C朗同美斯兩大球王嘅接班人前，「無敵」言之尚早。
連埋冬窗簽拿樸迪，曼城今季用咗2.2億鎊購入5守將；除咗門將艾達臣摩拉斯公認叫好外，其餘一般，盛年已過嘅中堅高柏尼連頂兩仗，都唔敢用前季新人王史東斯。首回合大膽用拿樸迪打左閘，俾紅軍嘅穆罕默德沙拿爆到甩轆、右閘基爾獲加從來唔覺勁，佢失首球有好大責任；仲有下月滿33歲嘅主力防中費蘭甸奴頂咗大半季，近期開始跌watt，上周擋唔住紅軍嘅阿歷士張伯倫後，再遭曼聯嘅保羅普巴同尼曼查馬迪下半場發力圍剿。
有美斯，巴塞近9季3入決賽例不虛發、有C朗，皇馬近4季3度封王歐聯。翻看近5季8強有3隊波首回合落後0比3，有2隊次回合返主場復仇成功照出局。剛戰上半場打出完美無鋒陣嘅曼城；今場出番阿古路打正箭頭，攻力必更強；同紅軍熟性一往無前，今晚「大」騷可期。