熱刺欠甚麼？

北倫敦大會熱刺終宣布解僱上任僅44天嘅替工領隊杜陀，Opta最新數據預測熱刺降班27.1%，博彩公司推斷森林最有機會逃出生天，兩支倫敦球會熱刺同韋斯咸「二死一」，剩返7場英超，今屆爭霸、爭前五，唔及避降班精彩。

問過Google AI點樣解決熱刺當前危機，佢提出四點方案，簡單講短線搵護級專家達治、中長線請迪沙比或者普捷天奴；簡化戰術、加速治理傷兵及解決領導層「DNA」危機。AI幫到手，但將帥微妙關係同高層嘅DNA冇辦法估準，熱刺擁有歐洲數一數二嘅新球場，球會收入位居世界前十位，但近年走低嘅關鍵係冇一套長遠嘅重組方案，前鋒孖寶卡尼同孫仔分別走後，隊內向心力消失，麻煩友中堅羅美路同雲迪雲「大頭症」發作，影響力凌駕一眾來去匆匆嘅熱刺領隊。AI冇提及方案係眾將係咪一條心為球會求存保招牌，先係下位主帥最大挑戰；仲有護級大敵韋斯咸嘅主帥係熱刺前波士紐奴、熱刺下場係作客由前阿仙奴隊長格列沙卡領軍嘅黑貓，單講戰意對手必定澎湃，必想置熱刺於死地。