MIRROR的「我」和「我哋」
《叱咤頒獎禮》塵埃落定，MIRROR失落專業推介組合大獎，唔少人已食住上，「都話MIRROR唔紅啦。」2023年嘅MIRROR係點？有4個成員搞咗個人演唱會，有成員一年出咗5首歌，成隊人出嘅solo加埋多到幾乎每個星期有新歌。但係團歌呢？成年只係出咗兩隻(其實有第三隻嘅，不過係英文歌，叱咤唔計)。
2023年嘅MIRROR，學Lokman話齋，好多「我」，太少「我哋」。
咁又能夠理解嘅，你去佢哋啲騷，fans嘅燈牌都係支持個別成員嘅，你有幾何見到佢哋拎住個牌寫「MIRROR」，咁公司做多啲solo都係配合返個需求。不過最近我睇到啲變化，佢哋公司應該好想做返強成個團。
首先，2024年第一首派台歌會係團歌，仲要係1月2號，叱咤一完即刻派台。大家睇下佢哋個宣傳post，抽咗新歌一句「任鎂光燈閃，未化開焦點，無前如火箭十二」，明顯想表達，無論攞唔攞到獎、攞咩獎，就係想話俾大家聽，MIRROR新一年以團隊再出發。
小道消息，據聞佢哋2024年團歌數目，會比2023年嘅兩首大幅增加，除咗12人嘅團歌，仲會推出小組團歌，solo當然會繼續出，但明顯係加大力度做團。加上2024年，佢哋差唔多頭半年都係做世界巡迴演唱會，復活節又會推出電影，都係12個人一齊，可以預計2024年MIRROR嘅「我哋」同「我」之間，應該會有一個好啲嘅平衡。
當然，最後作品好唔好我唔知，不過到今時今日仲推團，我都已覺得要俾掌聲。你話一開始個個都未係好紅時，就梗係要捆綁式宣傳先有效果啦；今時今日，好多成員都已獨當一面，有強大嘅粉絲群，就梗係sell solo嘅性價比高。加上經過5年，要加強成個團，用嘅力係當日嘅10倍，決心更係100倍，咁都肯嘗試，係難得嘅。
2024年，祝各位偶像同fans愈難得，愈值得。