由陳豪及黎耀祥主演的《殺手》大獲好評，二人早前接受林盛斌（Bob）和伍詠薇訪問，二人大談出道辛酸史，其中陳豪更自爆曾是夜蒲份子，更一星期蒲足五晚！
陳豪自爆拍攝電影《晚九朝五》的年代，還年輕的他幾乎每晚都去夜店夜蒲，一星期蒲足五晚，後來突然一下次醒覺，他說：「當時感覺就好似一盞射燈照住你，突然醒覺咁樣好浪費時間，係時候為人生做返啲嘢，於是就180度轉變，自此之後冇再踏足夜場，好努力為人生拼搏。」他指當年和一大班模特兒朋友落去，主要是跳下舞，又指自己「永遠都空手而回」︰「自己溝唔到女咪睇人溝女。每個人都要花段時間去認識自己，後來自己先知根本唔鍾意呢啲生活，只係想陪朋友。」
祥仔笑言自己不愛夜蒲，人生只去過一次Disco，去完就以後都不再去。他表示幸好自己演藝工作由TVB開始，起初有穩定的月薪收入，加上120個騷錢，收入穩定，他說：「我份人量力而為，量入為出，搵10蚊使8數，所以未試過冇飯開嘅日子。」問到貴為視帝，經常要「萬歲」請客，會否覺得肉赤？祥仔說：「如果收工煞科，頂多幾萬蚊，都可以嘅，冇乜所謂，大家開心。就算以前做細嘅，細有細份夾，唔會好吃力。」
陳豪表示初做演員的時候，曾經卡數冚卡數：「我做模特兒時代幾搵到錢，不過當我有心做演員時，電影圈又唔太吃香，開始冇嘢撈，試過半年、九個月，開始一年都冇工開，完全冇收入，唯有卡數冚卡數，差不多有成十萬卡數，但我唔會問屋企人拎錢。」
