史詩式經典電影《魔戒》(Lord of the Rings)三部曲翻睇多次都咁好睇,導演彼德積遜(Peter Jackson)居功厥偉,全球票房超過30億美元絕對有道理。亞馬遜(Amazon)電視頻道早前宣布向《魔戒》作者J.R.R.Tolkien的遺產管理基金購下版權。據娛樂網站Entertainment Weekly報道,亞馬遜用了2.5億美元購下《魔戒》版權,另外劇集宣傳和製作費又預計用上2.5億美元,即係5億美元(接近HK$40億)拍攝2季,認真大手筆。如一切順利開鏡,電視版《魔戒》就係史上最貴製作費嘅電視劇。