憑《愛．回家之開心速遞》演大小姐秘書Mandy入屋的謝芷倫(Jan)，日前在《法證先鋒IV》扮演死屍，劇中的她被封在真空袋內，繼而被棄屍大海。不少觀眾以為袋中的女屍只是一件道具，沒料到是由Jan親身上陣，坦言入袋的一刻極不安。
Jan為求逼真，保持姿勢瞓袋幾粒鐘。
Jan的眼球貼住個膠袋，直言壓到五官變形，扮死屍一點不好受！
Jan表示拍攝前，公司因安全問題找專人入袋試位︰「拍之前有開會研究同彩排點樣做，而且有人試過係OK，溝通過點樣做，例如︰萬一我喺膠袋入面真係好驚，唞唔到氣，要點樣表達。」她坦言埋位時有點害怕，但沒有想過自救方案︰「開頭都驚㗎，驚唞唔到氣又開唔切個袋，咪焗死？拍攝前我專程返公司研究同練習點樣做嘅，練習過好多次先真正拍。
後來套劇出咗街，有同事問我當時有冇拎住𠝹刀之類嘅利器，萬一有咩事可以自救，我真係冇啊！而家諗翻轉頭知我當時做咩咁大膽，連自救嘅方案都冇諗過，哈哈！就係太相信工作人員會控制住個時間，監察住唔會有事。」
問到有沒有因安全而辭演，Jan說︰「公司叫我演嘅角色都會應承做嘅，收到通知時已知道個角色將會死同要入膠袋，當時冇概念點樣真空法，不冇考慮過就應承咗。」她更為這個角色做了不少功課︰「其實我研究過喺袋入面嘅姿勢、面部表情、形體動作等，唔係就咁放鬆瞓喺度，係成個人都用咗力，定住個形，每次個姿勢同表情都要一樣，就算個膠袋壓落隻眼度都唔可以眨！」Jan果然專業！
