KOLOR甫出場已全場樂迷哄動，主音Sammy識做地除衫演出。
香港海洋公園水上樂園聯乘耀榮文化全新音樂會場地「AQUALAND」日前正式開幕，前晚(23日)舉行首場音樂會「NewBomb」，由樂隊 REVERY feat. KOLOR 打頭陣。KOLOR甫出場已引來全場樂迷哄動，不時拍手和唱，主音Sammy識做地除衫演出，當獻唱新歌《無極》時，Sammy自爆將當晚新歌拍攝成MV，感謝Fans做「臨記」：「呢個新場係第一次演出，我地都獻唱新歌，大家要跳得勁啲，10月會推出各大平台，令MV流傳萬世啊！」
繼承音樂與肌肉
Sammy完騷受訪時表示，支持業界設置新表演場地，令樂隊有更多演出機會：「因為呢啲戶外中小型場地真係唔多，而且Revery睇住佢哋大，所以一定要支持！睇住佢哋越嚟越大隻，佢地係好健康嘅樂隊成日做運動，佢哋『毛都未出齊』已經認識，係好難得。」Revery就感謝KOLOR支持，坦言努力做歌報答對方：「我哋細細個夾Band時係唱cover 歌，都係KOLOR啲歌，識咗佢哋之後，學識埋飲酒，聽住佢哋啲歌一齊成長。做好啲音樂已經係最好嘅報答，操大隻啲去繼承佢地啲肌肉！嚟緊我哋首新歌邀請KOLOR一齊玩吓，多謝佢哋！」
