Ivana為《MusicSus延音Bucking計劃》擔任講師，分享音樂創作歷程。
王菀之(Ivana)為香港遊樂場協會首個年度音樂企劃《MusicSus延音Bucking計劃》Master Class 004 擔任星級講師，與學員們分享音樂創作的歷程，企劃的終期匯演將於3月14日假麥花臣場館舉行，為學員們提供演出平台，讓他們透過音樂展現年輕人的才能。
席上Ivana分享成為唱作歌手20年的感受：「我同大家一樣，都係由學樂器到鍾意寫吓歌開始，由唔知道點樣將自己手寫出嚟嘅嘢，變成錄製嘅歌，知道點錄製又唔識得推出，識得推出又唔識得宣傳咁樣，一路慢慢去學習。」多位延音計劃學員輪流向Ivana提問，被問她如何保持創作初心，Ivana笑謂：「我要諗諗先，我應該係冇偏離初心，所以先搞成咁，都依然係為自己創作行先，所以有時要預咗有啲曲風係冇咁多人有共鳴。」
Ivana指，創作的標準應該由自己去定義。
死期可以迫出小宇宙
她直言從落筆寫歌的一刻，已經知道這首歌會得到幾多聽眾，對於有學員提到在社交平台出歌，如何吸引更多點擊，Ivana說：「你嘅作品從來都唔關view數字，你要有信心同鍾意先可以擺上網，view數實在有太多原因影響，連擺上網嗰日有冇其他事情發生都關事，你擺上網係為咗畀人哋多一個選擇。」她又指創作的標準應該由自己去定義：「例如做音樂會，就做好人哋願意買飛嘅標準，hopefully可以做到，但至少做好自己嘅準備就好足夠。正如寫歌咁，演唱會就嚟啦，寫首賣飛嘅歌得唔得？得，咁咪《末日》囉。但係如果有日係我有嘢想講，寫首《Shattered》咪冇人聽囉，但係無論點，我都對自己作品有信心。」
談到Ivana為其他歌手寫歌的取捨，她透露自己會先聽對方至少十首歌，同時亦會為對方的聲線而度身訂造：「究竟你落筆去寫係為咩，為自己定為市場，如果人哋有要求，呢個係package嚟，就變咗你應該要付嘅責任，唔可以人哋要抒情歌，你夾硬要寫rap俾人，咁都係不負責任。」她又提到創作需要自律，死線(deadline)是很好的輔助：「(平日)唔想寫可以唔寫，但係要交歌啦喎，下星期要錄啦喎，監製催啦喎，自然就會做咩都諗住，有啲歌詞就係沖涼嗰陣諗出嚟，完全唔關沖涼事，但係佢就係咁出咗嚟。」
暫不考慮開班授徒的Ivana，上堂完畢與一班學生合照留念。
為MusicSus延音Busking計劃任導師
Ivana與延音學員們傾到不捨得離開，會後更被學員瘋狂集郵，學員又大讚她是頂尖唱作人。Ivana很享受與年青人交流，讓她回憶20年前的自己：「佢哋問嘅問題都係我自己絕大部份都有經歷過，我好想同佢哋講，既然你哋咁熱愛音樂、咁有天賦，唔好將佢變成自己嘅壓力，透過音樂去發揮自己係好幸福嘅事，希望佢哋可以繼續多啲創作。」
Ivana又透露今年目標是推出全新專輯、演舞台劇、舉辦香港及巡迴演唱會，但紅館個唱一直未有着落，只因申請多年仍未有期：「紅館Book場嗰度，全港九都知道啦，真係要睇吓第十幾次申請先有啦，呢個神聖嘅場地，都申請咗幾年㗎啦。」
《MusicSus延音Bucking計劃》現階段的12組入圍單位，正密鑼緊鼓地進行街頭 busking 表演及相關演練。大會將於今年2月底公布入圍的4個終期單位，並將於3月14日登上麥花臣場館，與專業評審及表演嘉賓共同演出，為「延音 MusicSus」完美作結。
「延音 MusicSus」終期匯演詳情：
日期：3月14日(晚上7時30分至9時30分)
地點：旺角麥花臣場館
表演嘉賓 : 林一峰(Chet Lam)、徐偉賢(Peco Chui)、周鍚漢(Randy Chow)及 JW 王灝兒
Ivana自嘲音樂路途好崎嶇，指現時仍然很享受創作。