吳啟華首次直播帶貨遇滑鐵盧
現年59歲嘅吳啟華近年主力北上發展，佢除咗不時出席商演活動及登台之外，開設內地社交平台帳戶拍片維持知名度，最近佢舉行首場直播帶貨，但反應非常冷清。
吳啟華最近舉行首場直播帶貨，事前仲邀請11位香港藝人拍片幫手做宣傳，包括佘詩曼、黃宗澤、吳卓羲、馬國明、蔡少芬、宣萱、郭政鴻、張兆輝、阮兆祥、苑瓊丹及張耀揚。
直播鏡頭就採用美顏濾鏡
去到舉行直播當日，吳啟華直播所帶嘅貨品就係海味同滋補產品，搵嚟帶貨經驗豐富嘅林韋辰助陣，不過今次嘅反應認真麻麻。根據數據顯示，呢場直播嘅觀看次數竟然係少過2,500人，而留言嘅觀眾亦唔多。
喺直播帶貨中，介紹產品嘅重任係交俾林韋辰及助理身上，而吳啟華只係間唔中搭幾句；而直播鏡頭就採用美顏濾鏡，搞到佢哋面色蒼白，的確好難有說服力去sell產品。
原文刊登於 Yahoo 娛樂圈
