黃秋生與游學修首度合作演舞台劇《極地謎情》。(陳奕釗攝)
現年61歲的黃秋生與32歲的游學修，前者是入行40載的金馬金像影帝兼劇帝，後者則是集編導演和YouTuber於一身，一老一嫩，將於9月首次合演舞台劇《極地謎情》，兩人已開始圍讀劇本，阿修形容飽滿又充實，皆因秋生絕非「老pat pat」，即使他提出異議，大家仍可有傾有講。劇場以外，秋生自言是對網絡世界一竅不通的阿伯，卻大玩《Flower》的「開花舞」，又為「試當真」拍片，他明言不敢指手劃腳，同時又雀躍表示，「就等於阿伯鍾意跟𡃁妹拍拖一樣！」游學修聞言笑破肚皮，「呢啲叫反差萌，大家都覺得《Flower》係網紅跳，現在竟然由黃秋生跳，這就是趣味所在。」
秋生絕非老pat pat 唔一定我講你聽
其實秋生早於11年前已曾演過《極地謎情》(與梁祖堯合演《極地情聖》)，他坦言當年沒有認真審視翻譯劇本，「當時我已很久冇返到劇場，因為懶，沒有對照原裝劇本，所以演得不好。」今次發現很多忽略了的細節，驚嘆劇本層次豐富，就像一頓「視覺上的法國盛宴」。故事講述隱居多年的諾貝爾文學獎得主(黃秋生飾)，突然發表新作，且破例接受一位年輕記者的訪問。至於為何找游學修合演？向來要求高的秋生大讚阿修，「覺得他頗醒目又靚仔，年紀也適合角色，唔扮嘢又成熟，暫時搵不到任何缺點！」獲選中與秋生合演舞台劇，受寵若驚的阿修雖然𦧲飯應，但亦難免擔心，「總會好奇，會唔會好恐怖，很驚會係『老pat pat』！」在導演陳淑儀的帶領下，阿修很享受3個人圍讀劇本的時間，「上次秋生哥提出一些看法，我大膽提出異議，他聽了就話我才對，唔係他們講我聽，我要絕對服從。」
逆向思維 慶祝仲未死
極地謎情》是「神戲劇場」10周年的演出，作為創辦人的黃秋生同時會推出自傳《秋生回憶》，他半說笑指，全是行政總監張珮華的計劃，自言甚少慶祝周年紀念或生日，「生日代表又早死一年，有咩好慶祝？唔通因為快啲死而慶祝？大家一起唱《就死歌》？」阿修反問，「咪就係慶祝仲未死！」秋生恍然大悟的點點頭，，「咁都幾有趣，慶祝十周年仲未執笠，不知捱唔捱到第11年！」然後，秋生才認真道，「唔係講笑，前兩年開始充滿危機感，越來越強，唔知有冇下次。感覺就係現時打仗，你駕車上路，隨時有飛彈射過來，射中就咩都冇，同時你不斷見前面的車被炸毀，幾時輪到我？所以會珍惜每一次。」他慨嘆以前是不顧一切的發力向前衝，現在卻要花不少時間修修補補。
游學修30歲已是更年期？
游學修回應道，「雖然我起跑比他遲，但飛彈是周圍炸，所以會思考人生是否只有事業？尤其近兩年，甚少見家人，連私人時間也不多，會唔會50或60歲都係咁？」秋生聞言即說：「如果到時都咁忙，我恭喜你！」阿修則認為，視乎觀點與角度，若然60歲仍是大忙人，表面看很成功，但沒時間與家人見面，也是另一種失敗，「我覺得30歲是更年期，當你廿幾歲時，唔會去思考盡頭，但過咗30歲，就會認真思考，原來爸爸在這年紀已生咗我，這旅程還有甚麼想做？近兩年反而不太看重事業成就。」好奇問他，可有甚麼計劃？他認真表示，希望生活與工作平衡，至於事業發展，希望除了YouTube頻道「試當真」，也想多涉獵其他範疇，以及舉辦「校花校草選舉」之類的培養新生計劃。
一老一嫰crossover
談起網絡頻道，秋生不禁慨嘆，「我只懂按電話開關，(你有玩FB/IG post？)我只係阿伯群中，比較叻的一個。」他提起早前在游學修的提議下，拍了一段跳《Flower》「開花舞」的短片，網民反應熱烈，令他大感疑惑，「其實我在網上看到這段舞，覺得似搓老泥，背景音樂又聽到毛管戙。我不抗拒拍那條片，只係完全不明白，有甚麼好笑？我覺得自己已不是年輕人的世界，完全不懂哪些準則。」阿修認真解釋，「呢啲叫反差萌，因為『開花舞』是網紅跳，連我都唔會跳，現在竟然越級由秋生哥玩，重點係你唔屬於那世界，突然就會好震撼，這就是趣味所在！」
阿修續說，「以秋生的級數，一定是客串形式，在網絡出現才好玩。」可以點玩？秋生大感雀躍，也樂於搞突破，「就等於阿伯鍾意跟𡃁妹拍拖，由她帶我去吃雪糕一樣！」接著他語重心長地說：「就像阿伯睇到年輕人駕駛，唔好指手劃腳，吩咐他轉左轉右，因為這已是他們的世界，我所屬的世界已過去。」過去，不代表停滯不前，談到「一老一嫩」crossover的新點子，兩人越講越興奮，除了與秋生再二創《二泊三日》MV，還有玩《Man In Black》組合，秋生笑言：「即係兩個戴太陽眼鏡，原來係失明……」
採：Grace 攝：陳奕釗
化妝：Jolinn Ng(黃秋生), Julie.H @JLAB(游學修)
髮型：Taky Chung@AdmiX Hair Styling(黃秋生),
Ray Mork@AdmiX Hair Styling(游學修)
服裝：@yohjiyamamotoofficial from @ithk(黃秋生),
@needles_tokyo_official, @exi.tofficialfrom @ithk(游學修)
場地: 柏斯音樂
黃秋生與游學修接受本報專訪。