向來俾人大癲大肺、鍾意shopping、貪玩形象嘅杜如風（Helen），對於愛情事一向走低調路線，多年嚟先後同黃又南、導演郭子健及余文樂等人傳過緋聞，但都不獲得證實，直至前年杜如風先親口承認曾與黃又南拍過拖，仲話佢哋喺入行前已經認識，當時佢哋成日同朋友聚會，慢慢日久生情，不過戀情維持唔夠一年就分手，而現時佢哋已經昇華去到親戚關係。
自爆前渣男友電話號碼
J2最新風水命理節目《數你條命》第一集主題係「渣男小三事務所」，邀請杜如風、利穎怡、胡美貽及施焯日擔任嘉賓，期間靈魂談判師Depp幫手分析四人前度電話號碼嘅其中四個字，拆解數字背後的玄機。杜如風就分享其中一位擅長隱瞞嘅前渣男友電話號碼嘅其中四個字，仲話「佢對住我，我係坐正，但你唔知佢出面坐正咗幾多個。」及表示同對方嘅感情斷斷續續：「第一年拍咗三個月，第二年返嚟行咗一個月，其餘時間佢就同其他女仔拍拖，攝嚟攝去，不停翻兜。佢會自動失蹤，但佢真係好細心嘅，所有女仔嘅嘢都記得晒。」雖然杜如風冇公開前渣男友身份，不過個電話號碼嘅其中四個字偏偏同黃又南嘅電話號碼脗合。
原文刊登於 Yahoo 娛樂圈
