Ad Block Ad Block
娛樂
2022-06-14 16:02:01

東張西望|港男課金逾10萬為與美女直播主共膳 被冷待認為對方當佢係水魚

分享:

《東張西望》截圖

直播平台於近年愈見流行,唔少人不惜課金打賞直播主;日前《東張西望》就報導咗胡先生與直播主李小姐嘅故事,胡先生2年間共向李小姐課金逾10萬,仲喺對方屋企人入醫院時提供金錢援助,不過發現自己被李小姐當成水魚。

胡先生表示自己於2018年接觸直播平台,一開始就已經捧李小姐場;而李小姐由2017年加入做主播,曾成為平台首個累積滿100萬顆鑽石嘅女主播,即相等於現金價值約8萬元,人氣爆登。期間,胡先生不斷送贈李小姐虛擬禮物,忠實程度連李小姐都認得佢,仲曾經喺影片描述對佢嘅觀感,相當識做。直至去年3月底,李小姐宣布退出直播平台,但希望臨別前可親自與粉絲告別,於是提出與該月課金最多嘅3位粉絲共進午餐或下午茶,又會向第4至10名粉絲送上小禮物;胡先生就用咗3至4萬元成為冠軍,可以與李小姐一同用膳。

主動向李小姐提供金錢援助

不過,胡先生表示餐飯一直被拖延,直到12月先成事,當日原定時間為下午1時半至下午2時半,但胡先生就話呢段時間內其實都無食飯,李小姐只係喺到化妝、簽名和自拍,與自己及其餘兩名粉絲零交流,胡先生心有不甘,認為被冷待,對方僅當佢哋係水魚。《東張西望》於訪問期間打畀李小姐,對方直言自己喺上次見面過程中有與粉絲傾計,仲反問係咪要全程不間斷傾先叫傾計;又指,胡先生唔知從咩途徑得到自己手機號碼,不時傳訊息畀佢問及想要咩禮物、甚至叫佢做「老婆」及按摩收費。

飯局後,胡先生與李小姐仍保持聯絡,胡先生仲主動向李小姐提供金錢援助,希望李小姐跌倒入院嘅嫲嫲可以由公立醫院轉到私立醫院,但最後胡先生發現李小姐嫲嫲並未有轉到私家醫院,於是問及對方原因;李小姐就表示因為嫲嫲確診新冠肺炎,所以未能轉到私家醫院。經過呢次胡先生終於醒覺,決定唔再睇直播,而李小姐都直言唔會再與胡先生聯絡。

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

《東張西望》截圖

原文刊登於 Yahoo娛樂LOL,am730獲授權轉載

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受