言論出位嘅林作一向都有唔少抽水「辣火頭」事件，日前佢就抽水鑽石山荷里活廣場斬人血案，喺社交網站上載自己同疑犯嘅合照拼圖，並刻意模仿疑犯嘅衣著打扮，結果被網民鬧爆冷血，之後林作就刪PO了事。佢任職嘅保險公司亦出聲明指林作已經被炒魷魚，林作亦承認已被炒。林作喺前日（3日）曾經發文話唔係道歉，而係喺4號開辯論大會，不過好快就將帖文刪除，並再出PO話會喺今日6點喺半山麥當勞道屋企舉行記者招待會。
麥明詩讚好保險公司聲明
今次林作可以話抽水抽著火水，令網民大為震怒紛紛留言鬧爆，除咗前女友麥明詩一度喺保險公司發出嘅聲明中讚好，連林作嘅靚女下線「保險KOL」Jasmine亦即時同佢割蓆，喺個人IG出Story話：「SPECIAL ANNOUNCEMENT: 收到很多客人查詢，大家請放心，你們的保單不會受到影響，還未批的保單會繼續努力跟進。已受保的保單，我也會一直努力幫你們處理。不用擔心，絕不變成孤兒單，我會努力做好自己最愛的事業。另外：致大保險公司的愛戴，不會考慮轉公司了，謝謝邀請，有心。」
原文刊登於 娛樂LOL