Coffee大住肚去玩雪玩水。
林芊妤(Coffee)今年5月宣布懷孕4個月，雖然DNA「T21測試」發現染色體13或有問題，幸好BB至今一切正常，令她放下心頭大石。日前，Coffee在IG分享落雪照，並寫道：「本身諗住今年無去滑雪，應該無機會見到落雪，估唔到最後一朝早喺Cradle Mountain山上竟然落雪。」
Coffee再po一段與老公對話，「呢個落雪嘅早上喺床上嘅一段對話。」原來Coffee老公話發夢見到BB，仲話BB好醜樣，醜到唔想抱。Coffee就以多個笑到喊的emoji表達。
大肚坐大水泡
Coffee昨日(31日)IG分享多張水上樂園照。她寫道：「彥彥由暑假前已經問我幾時可以去waterpark。趁住去完越南旅行再去澳洲探親，返到香港仲有最後幾日暑假，好啦，我捨命陪君子。平時我自己玩到癲㗎嘛，但今次我冇得玩，淨係行行企企同埋浸下水食下嘢。」大大個肚坐住大水泡的Coffee表示自己愈來愈腫，肥嘟嘟。
