梁詠琪宣布舉行巡唱 對梁文禮「示愛」唔上心

梁詠琪(Gigi)完成紅館演唱會之後，休息數天便再投入工作。今日她出席煤氣公司在銅鑼灣開設新店的活動。Gigi自言在煤氣公司完成烹飪課程，即場與外籍大廚完成以都爹利街作設計的立體甜品。她又表示，因為開騷的關係，已經很久沒有炮製蛋糕，打算月底製作囡囡想要的蛋糕，為她慶祝生日。

下半年開始巡迴演唱

Gigi透露現已開始籌備巡迴演唱會，計劃在東南亞及歐洲舉行，最近忙於研究巡唱的內容及歌單，希望可以做好一些，亦要把廣東歌轉做國語歌單。對上一次Gigi舉行巡唱已經是2018年，所以她非常期待，並會在暑假檔期帶埋囡囡一齊去，讓她知道演唱會的製作過程並不簡單。她又表示，日前完騷後獲囡囡送上畫作，讚她「good job」，而她亦趁機教囡囡要一齊進步。

梁文禮「唔重要」

提到梁文禮向她道歉一事，Gigi就表示︰「我諗都唔重要啦，唔好再喺呢件事上面停留，由件事過去。大家繼續向前行，做好自己就夠，真係唔重要啦！無謂再喺呢件事上面兜圈。」梁文禮形容是「示愛」，問Gigi可會接受，她就再次表示：「真係唔重要啦！唔講啦！」至於周啟生撐梁文禮批評她沒錯，Gigi稱不便再評論下去。