楊思琦近日喺抖音直播間開咗個「付費連線」服務。
今年43歲嘅2001年香港小姐冠軍楊思琦，為賺錢養仔女同供樓，近年積極北上發展，佢真係咩工作都會嘗試，包括登台、拍短片、開直播及出席活動等等。佢近日仲喺抖音直播間開咗個「付費連線」服務，實行收費陪聊，真係為咗搵錢想盡辦法！
填寫理由才有機被選中
有網友喺楊思琦進行抖音直播時發現右下角多左個「付費連線」嘅連接，呢位網民話楊思琦喺直播時同在場約1,500名網民表示：「大家想和我聊天的，可以點擊下邊的付費連線」。而呢個「付費連線」需支付8,888抖幣，再加上填寫申請理由，仲要俾楊思琦選中，然後先可以同佢進行1對1嘅付費限時連線，而連線聊天最長為5分鐘。
有網民就計一計8,888抖幣即係幾多錢，抖幣同人民幣兌換率為7:1，即係8,888抖幣等於1,270元人民幣，而港幣就係大約1,484元，即係同楊思琦傾5分鐘偈就要畀1,484港元。 唔少網民都認為楊思琦此舉係缺錢要狂撈金，網友留言話佢「這撈金撈得也太明顯了吧」、「憑咩？呢個價錢去睇MIRROR啦」」及「吃相難看」等等，同時亦有網民認為「不想花錢的可以不連線啊，人家又沒強迫你支付」等等。
原文刊登於 Yahoo娛樂LOL，am730獲授權轉載
