2025-08-25 14:00:00

江若琳相隔八年開騷High爆完成跳舞壯舉有望開Part2

江若琳(Elanne)昨日（24日）於旺角麥花臣場館舉行《The Witness 心的見證演唱會2025》。(娛樂組攝)

江若琳(Elanne)昨日（24日）於旺角麥花臣場館舉行《The Witness 心的見證演唱會2025》，這次是Elanne相隔八年開騷，全場座無虛席！圈中好友周慧敏、唐詩詠、余慕蓮(魚毛)、方力申、鄭俊弘跟老婆何雁詩、邱士縉、詹瑞文、小肥、方皓玟、老公蕭潤邦及囝囝Owen亦有到場支持。Elanne在今次演唱會唱出多首昔日經典代表作，分別包括有：《錯愛》、《你不在了》、《第一眼》、《眼淚無用》、《傷情路》、《Show You》、《BaBaYa》等。講到演唱會的環節，Elanne除了在演唱會勁歌熱舞演出外，還走到台下與觀眾互動大玩泡沫水槍，氣氛非常好。

指開騷緊張到完全冇瞓覺

Elanne在謝幕環節在台上感性發言：「我真係好多謝所有朋友同我屋企人同fans，我真係忍得好辛苦，好多謝你哋無論我去邊度，都會陪住我行每一個地方。」另外Elanne還獻唱新歌《把自己還給自己》，她說：「我好多謝一個好勇敢好堅強嘅我，我好難過嘅時候，總有一把聲音叫江若琳唔好放棄，只要唔好放棄你自己，留一啖氣就有奇蹟，今日我覺得我見到奇蹟，所以我想多謝一個勇敢嘅自己。」

Elanne完騷後接受訪問表示：「我而家終於放鬆心情，以為自己唔緊張，但係其實我好緊張，係完全冇瞓過覺，我就會覺得好擔憂，雖然唔係100分，但係我已經盡咗最大努力，我真係好enjoy每一個時刻。」講到在演唱會多次感動落淚，Elanne說：「應該係講屋企人朋友，同埋見到我啲fans嗰一part，我真係忍得好辛苦，因為我已經冇瞓覺，我把聲又衰，一喊就搞唔掂，又見到全場都係好支持我嘅人。」

有望演唱會開Part2

被問到最喜歡演唱會那一個環節，Elanne直言：「跳舞，我腰都斷，簡直係一個壯舉要跳十幾分鐘，話要跳就一定要跳到最好，唔可以辜負觀眾，雖然有啲甩漏，但係現場氣氛都好好。」江若琳續指過去的一星期兒子發燒，所以令她影響心情，不過非常感恩兒子已經康復能夠到場支持她。至於是否有計劃開演唱會Part 2，Elanne說：「就要靠大家口碑去話俾人聽，呢一個演唱會好好睇，希望能開part two，其實麥花臣場館真係好爆，所以檔期前後都不能加場，下次要早啲book。」Elanne亦有分享新歌《把自己還給自己》的概念：「無論經過咗幾多困難，經歷咗幾差嘅事，其實個天都將最好嘅自己還返俾你。」