羅家英精神奕奕現身頒獎活動。(娛樂組攝)
羅家英今日到紅磡出席電影活動，擔任頒獎嘉賓。他面色不錯，並稱自己「身體幾好」，暫時仍然會工作，稍後更會到內地多個地方與朱茵做話劇，並且要回港做大戲，未有因為身體出問題而停工。
問到他的健康狀況，家英哥說︰「目前冇咩嘢，個人係弱咗嘅，打咗啲針令個人虛弱咗，糖尿會增高 ，同埋會貧血，唔多夠氣，成日要瞓覺，得閒都要做下啲運動，散步咁啦！」他又笑言汪明荃叮囑他勿在人多地方逗留，少些做訪問，因為「訪問最嘥氣」，但知道大家都很關心他，所以都會跟大家做訪問。
羅家英面色不錯，他表示需要定期檢查及打針。(娛樂組攝)
問到汪阿姐有沒有為他煲湯，或者為他請看護，他稱汪阿姐有照顧其飲食，不用請看護，笑謂對方現時對他和藹很多，但仍不忘隔空向阿姐表達愛意說︰「佢係被我看護。」他稱現時仍需要定期檢查，他說︰「本來糖尿食藥，今日見咗糖尿醫生，話我好嚴重，要打針，所以聽日開始打針，一世㗎喇！遲啲會去睇泌尿科醫生，遲啲打女性荷爾蒙針。」
提到早前他擔任莫文蔚演唱會嘉賓，問到稍後會否做呂爵安個唱的嘉賓，他表示不會人人邀請他，並指那次到西安為莫文蔚上台獻唱，他說︰「因為我哋係《大話西遊》(周星馳兩部《西遊記》作品的內地統稱)合作，大家有個回憶，我哋仲有叫埋《Only You》作者一齊去，我哋叫做大話西遊31年大聚會！」
他稱跟朱茵的巡迴話粵語話劇《驢得水》尚餘廿多個站，包括鄭州、山東、內蒙古等等，其後又要回香港做大戲，11月又要與阿姐到不丹拍節目。
ADVERTISEMENT
20周年「全城撐本地消費3重大激賞」！ 即睇活動詳情！
