近期有消息指，加入華納唱片8年嘅Janice衛蘭，有意今年約滿後同孖生妹妹Jill衛詩一齊走人。
傳陳凱詠加盟分薄資源
有傳華納近年眼見MC張天賦、洪嘉豪等男歌手都發展順利，於是將資源投放喺2人身上，而同公司其他單位如Dear Jane、陳蕾等都有一定工作安排，甚至去年大擲百萬為旗下多位新人喺香港站走廊掛巨幅廣告宣傳。反觀Janice自去年7月開完紅館個唱後，近乎銷聲匿跡，加上盛傳事先張揚同環球等完約嘅Jace陳凱詠將會加盟華納，進一步分薄資源，令Janice決定約滿後掹埋妹妹衛詩一齊走。兩姊妹嘅IG已經唔見貼出華納嘅聯絡方法，似乎暗示離巢。
▼重溫MC張天賦演唱會▼
獲華納爭取到叱咤女歌手金獎
獲黎明賞識簽下嘅衛蘭，2005年出道後旋即上位，橫掃當年新人獎後更有多首歌曲大熱，但後來因為身型發福等原因而人氣下滑。2015年轉會傾約時，有傳Janice要求華納將妹妹衛詩一併簽下。加盟華納後Janice重新彈起，期間出過6張專輯兼開過2次紅館演唱會，華納更全力催谷聲勢，為Janice爭取到商台叱咤女歌手金獎。
原文刊登於 Yahoo 娛樂圈