2025-08-07 21:30:00

蔡瀚億喜歡被赤裸男大叫Baby 慶幸自己結咗婚先入行

蔡瀚億（BabyJohn）接受李有毅（Ben）和兒子李國煒（Benson）主持的新城廣播《Ben同Benson「chur」到行》錄音訪問，他在節目中拆解英文名字的由來，同時感激太太在他遇上事業低潮時在身邊支持。

自小充滿演戲細胞的BabyJohn，小時候會在家中模仿電視劇的角色自娛，讀書時期亦有參與舞台劇演出，他透露：「我中二時參加一個舞台劇，劇中個名就係叫BabyJohn，完成劇團拆台後，我好唔捨得同劇演員，一路拆台一路喊，啲演員見到就叫我用番BabyJohn個名，一直用到依家。」

BabyJohn又大爆有關他名字的趣事，「身邊有啲朋友開始生小朋友，佢哋會叫啲仔女叫我做Uncle Baby，係咪好混亂呢？究竟係Uncle定Baby呢？哈哈！最正係之前拍戲嘅攝影師，片場多數都係男工作人員，有啲仲熱到赤裸上身抬機，然後佢哋會嗌我『喂，Baby過來度一度位』，好麻甩佬，好正，我好鍾意。」

BabyJohn在節目中拆解英文名字的由來，同時感激太太在他遇上事業低潮時在身邊支持。

BabyJohn於2012年與圈外女友Dount結婚，當年只有26歲的他，並不覺得早婚，「結婚唔需要年齡規定，結婚嘅定義同原因都唔重要，兩個人嘅誓約先係最重要。」他又慶幸自己在入行前已結婚，要不然跟太太已分手收場，「唔好話入咗行有乜引誘，拍戲拍到三更半夜先返屋企，朝早又走去拍戲，都冇時間去建立關係，連溝通時間都冇，但結婚後，返到屋企就見到面，如果冇結婚，我同太太都幾肯定已經分咗手。」

在圈中打滾了數年，BabyJohn在2018年自組公司，可惜之後撞正疫情，大概有一兩年時間沒有接觸表演工作，令他萌生轉行念頭，「好彩當時太太陪喺身邊，又成日鼓勵我，佢話『唔緊要啦，我哋生活到，睇吓上天有咩安排』，好感激太太喺低潮嘅鼓勵。」