自訂車牌「KEUNG T0」今日最終以3.8萬元成交。(林俊源攝)
運輸署今日(17日)舉行自訂車牌拍賣會，焦點所在梗係男子組合MIRROR成員姜濤嘅英文名「KEUNG T0」，呢個車牌最終以3.8萬元畀一位女士投到，不過原來今日兩場拍賣仲有10個車牌貴過呢個價成交。
喺今日上、下晝兩場拍賣之中，最高成交價嘅係12萬元嘅「DM ME」，第二高就係9萬元嘅「MY BABE」，其餘由高至低就包括「HHW」(8萬元)、「33 AA」同「RA1N」(7.5萬元)、「CCC1」(7.2萬元)、「OHOHO」(5萬元)，以及4萬幾蚊就有交易嘅「1CO」、「GOODDAY1」同「Y0U L1KE」。
「1 YUM1 1」車牌3.2萬成交
另外，今日亦都有5個車牌同「KEUNG T0」一樣用3.8萬元成交。運輸署就話，連同57個冇人競投而分配畀申請人嘅車牌，全日拍賣共得款項314.4萬元，亦冇車牌拍賣唔出。Ray又留意到，上晝嗰場有一個「1 YUM1 1」車牌以3.2萬元成交，而咁啱Yumi正正係歌手鍾柔美嘅英文名，睇嚟真係幾巧合咁喎！
