宋芝齡稱區選如香港小姐「友誼第一」　希望變成「實幹型」｜Ray Online

藝人宋芝齡代表自由黨出戰區議會灣仔區直選，佢今朝正式報名參選。提名期只係去到第4日，當區暫時已經有4人表示會參選，預料競爭非常激烈。曾經參選1996年香港小姐選舉嘅宋芝齡，形容今次選舉氣氛好似參選香港小姐咁，話認識其他參選人，最終勝選人都係為咗服務社區，揚言友誼第一、冇壓力。

宋芝齡話向「三會」成員爭取提名嘅過程順利愉快，成員都見到佢真實嘅一面。另一方面，佢亦話街坊對佢參選嘅反應幾好，認得佢又嗌得出佢全名，唔少市民要求合照，仲話佢真人瘦過上鏡。宋芝齡話希望成為「實幹型」，如果成功當選，會特別關注交通同環保議題，例如出年會實施垃圾徵費，佢會多做解說工作。宋芝齡又多謝自由黨黨友支持，尤其話黨主席邵家輝提供好多寶貴意見，包括教佢減輕心理壓力，又提醒佢要謙卑，唔可以忽視當區任何一個人。

「大王」安德尊未必能助選

至於會唔會搵佢緋聞對象、同屬《流行都市》主持嘅「大王」安德尊助選，宋芝齡話早前已經「無聲無息」向公司請假，同事都係睇新聞先知佢參選，又話所有同事都要跟從編班，未必可以碰面。

其餘已報名參選區議會選舉的名單：區議會選舉2023｜地方選區及地區委員會界別最新參選名單 (持續更新)